الحقونا يا جدعان شوية هوا ولا كباية ميه

السلام عليكم ورحمة الله وبركاته..

---------------------


بقالى كام يوم مش بنزل الشغل..

المهم قررت انى انزل انهارده..


صحيت صليت الفجر وقعدت شويه.. وقولت امشى بدرى قبل ما الجو يحرر..

لسه خارجه من البيت لقيت ..لقيت لفحة هوا سخن بتخبطنى فى وشى ..

قولت خير ......

روحت الموقف علشان اركب ..مجرد ما دخلت العربيه لقيت الناس قاعدين يهفهفوا واللى معاه ورقه عمال يهوى بيها على نفسه واللى عمال يهوى بايده واللى فاتح القميص ع الاخر ..
قولت ايه ده ؟؟ الموضوع مش للدرجه يعنى..

مكملش دقيقه من دخولى العربيه وبقيت انا كمان مش طايقه نفسى ..واقعدت اهفهف انا كمان..!

وصلت الشغل بعد عناء مع المواصلات ..

كنت بموت خلاص..!!!!

دخلت الاوضه ..لقيت التكييف شغال ..


يا سلاااااااااااااااااااااااااااااااااام..

اخيرااااااااااااااا..

الواحد كان قاعد وكأنه فى الجنه ومش عايز يخرج من الاوضه..

بعد ما خلصنا ..

طبعا المواصلات وقت الذروه صعبه جدااااااا..

الناس واقفه فى الشمس مستنيه العربيات والجو بيغلى والاسفلت نفسه مولع ومحدش طايق يقف ثانيه واحده ..

وانا واقفه كده وعمال أتأمل والعربيات الملاكى عمالى تعدى من قدامى اشي مرسيدس واشى بي ام دبلو واشى كرولا واشى سكودا..

والنا س هى كمان بتبص وكل واحد عينه هتطلع على العربيه وقلبه هيتخلع من مكانه..


آآآآآآآآآآآآآآآآآآآآآآآآآآآآآآآآآآآآآآآآآه..


آآآآآآآه لو الواحده عندها عربيه دلوقتى ..مش كان زمانها موقفتش الوقفه المهببه دى ..كان زمانها قاعده زى الباشا فى العربيه والتكييف شغال وعاااااااااااااااايشه..!

ودماغ الواحد عمال يودي ويجيب ..انتى لازم تشدى حيلك علشان تجيبيلك عربيه ولو هتيجي على نفسك وتتعبى بس مش مشكله ايه يعنى..!

قولت سبحان الله ..

اول حاجه الواحد المفروض يفكر فيها فى يوم زى ده ..موقف الحشر يوم القيامه .. وبدل ده عمال يفكر فى العربيات !!

بدل ما يفكر فى النار وحرها ..بيفكر فى التكييفات والمصايف!!

سبحان ربي!!



اول ما الناس تبعث للحشر يوم القيامه وتساق لارض المحشر ..

نفس المنظر اللى كنا بنشوفه فى الدنيا هنشوفه فى الاخره..

(يَوْمَ نَحْشُرُ الْمُتَّقِينَ إِلَى الرَّحْمَنِ وَفْدًا*وَنَسُوقُ الْمُجْرِمِينَ إِلَى جَهَنَّمَ وِرْدًا)

وفدا : يعنى ركبانا ..رايحين وفود لربنا سبحانه وتعالى والملائكه بتحفهم وهما راكبين احسن ركوبه..

وناس تانيه ..الملايكه بتسوقهم لارض المحشر ..وناس بتتسحب وتنجر لارض المحشر عياذا بالله ..

انتى عايزه تبقى مين فى دول ؟؟

طبعا من مش محتاجه تفكير ..

من النوع الاول طبعا ..

طيب عملتى ايه علشان تبقى معاهم ؟؟؟

ربنا قال عنهم (يوم نحشر المتقين) .. هل تحققت فيكى صفات المتقين ؟؟






الحمد لله ربنا يسر وركبت عربيه ..

قعدت جوه العربيه والعرق بيشر منى ..

بصيت لنفسى شويه..

آآآآآآآآآآآآآآآآآآآآآآآآآآآآآآآآآآآآآه..

دلوقتى جايه تفتكرى حديث النبي ..

(( تدني الشمس يوم القيامة من الخلق حتى تكون منهم كمقدار ميل، فيكون الناس على قدر أعمالهم في العرق، فمنهم من يكون إلى كعبيه، ومنهم من يكون إلى ركبتيه، ومنهم من يكون إلى حقويه ومنهم من يلجمه العرق إلجاما )) رواه مسلم .

ياترى فى الموقف العظيم ده هتبقى مين فى دول ..؟؟؟

لما تقفى حافيه عاريه والشمس على بعد ميل منك!!!

بالله عليكم انا عايزه كل واحده تتخيل الموقف ده ..!!

الشمس دلوقتى على بعد 93 مليووووون ميل..والحراره بالمنظر اللى مش قادرين نستحمله ده ..!!

ده العلما ء بيقولوا لو الشمس اقتربت ميل واحد من الارض كمان الارض كلها هتولع وتتحرق!!

ما بالكم لما تبقى على بعد ميل منى ومنك يا اخى ومنك يا اختى ؟؟!!!

هنقدر نستحمل ؟؟؟؟!!

محدش هيقدر يستحمل طبعا ..

طيب ايه الحل ؟؟؟

الحل ..

عن أبي هريرة رضي الله عنه عن النبي صلى الله عليه وسلم قال ( سبعة يظلهم الله تعالى في ظله يوم لا ظل إلا ظله إمام عادل وشاب نشأ في عبادة الله ورجل قلبه معلق بالمسجد ورجلان تحابا في الله اجتمعا عليه وتفرقا عليه ورجل ذكر الله خاليا ففاضت عيناه ورجل دعته امرأة ذات منصب وجمال فقال إني أخاف الله ورجل تصدق بصدقة فأخفاها حتى لا تعلم شماله ما تنفق يمينه )

ياترى شغلتى بالك فى مره من المرات انك لازم تكونى واحده فى دول والا هتبقى عياذا بالله فى الشمس الحارقه اللى على بعد ميل؟؟ !!

قال رسول الله صلى الله عليه وسلم (تعلموا البقرة وآل عمران فإنهما الزهراوان يظلان صاحبهما يوم القيامة كأنهما غمامتان أو غيايتان أو فرقان من طير صواف)

فكرتى تحفظى وتتعلمى كتاب ربنا بجد ..ولا هو سهل جدا نصم الكتب فى المدرسه والكليه ..انما كتاب ربنا نبقى نحفظه بعدين لما نفوق..!!









روحت البيت ..

اول ما دخلت جريت جرىوقفت قدام التلاجه ..

مش قادره خلاص ..هموت من العطش بس مينفعش صايمه!


ساعتها افتكرت حوض النبي صلى الله عليه وسلم..

والناس فى عز الحر يوم القيامه ونفسهم فى نقطة ميه !!

ياترى هتبقى من اللى هيشربوا من حوض النبى شربة عمرك ما هتعطشى بعدها ابدا ؟؟

ولا هيتقالك وانتى رايحه على الحوض (سحقا سحقا ..بعد بعدا ..) ؟؟

قال رسول الله صلى الله عليه وسلم (إني فرطكم على الحوض من مر علي شرب ومن شرب لم يظمأ أبدا ليردن علي أقوام أعرفهم ويعرفونني ثم يحال بيني وبينهم فأقول إنهم مني . فيقال إنك لا تدري ما أحدثوا بعدك ؟ فأقول سحقا سحقا لمن غير بعدي ) متفق عليه

آآآآآآآآآآآآآآآآآآآآآآآآآآآآآآآآآآآه..

آآآآآآآآآآآه..

خايفه عليكى يا اختى ياللى مش راضيه تبطلى تكلمى الولاد ..يلى مش راضيه تلبسى حجابك ..يلى مش راضيه تحافظى على الفرائض وبتستهزئ بالسنن

تحبى انه يتقالك سحقا سحقا ..بعدا بعدا ..وتتحرمى من الشرب من حوض النبي فى الموقف ده؟؟


آآآآآآآآآآآآآآآآه..

خايفه عليكى يا اختى ..يلى مش راضيه تصححى حجابك ولبسك ..يلى لسه مش راضيه تسيبى الميك اب علشان شكلك هيبقى وحش ..يلى مش راضيه تبطلى سماع اغانى الحب وافلام الرومانسيه اللى دمرت بنات امة محمد!

تحبى انه يتقالك سحقا سحقا.. بعدا بعدا ..وتتحرمى من الشرب من حوض النبي فى الموقف ده؟؟






كفايه بقى يا شباب ويا بنات ..كفايه غفله بقى ..

لما نلاقى الجو حر لازم نفتكر قول الله تعالى
(قُلْ نَارُ جَهَنَّمَ أَشَدُّ حَرًّا)
ونبدأ بجد نجتهد ونشتغل ونعمل كل حاجه تنجينا من النار وعذابها ..

يا شباب ويا بنات يلى مش طايقين شوية حر ومش قادرين تعيشوا من غير المراوح والمكيفات ..هتعملوا ايه فى يوم بالف سنه مفيش فيه نجاة الا لمن اطاع اوامر الله واجتنب نواهييه ..؟؟؟






يلا يا شباب يا بنات نعلنها توبة من دلوقتى ..
نندم فيها على كل اللى فات ..وكل واحد فينا يعاهد ربنا ..
من هنا وجاى مش هعصيك يارب ..هجاهد نفسى وهبدأ حياه جديده ..
حياه كلها فى طاعتك وفى رضاك يارب ..


مكتبتش الكلام ده وربنا يعلم الا علشان خايفه على اخواتى ونفسى كلنا نكون فى ظل عرش الله و نشرب من ايد النبي صلى الله عليه وسلم ..

موضوع مشكوووووووووور
تقبلى تحياتى
""""""""""""اللهم بلغنا رمضان""""""""""

بارك الله فيك يابنت دشنا .. واسكننا واياك فسيح جناته

نشكر لكي هذه التذكرة يا اخت (بنت دشنا)
نسأل الله أن يجعلها في ميزان حسناتك
اللهم تب علينا لنتوب
اللهم اجعل لما قبل الموت توبة نصوحة

تعطرت صفحتى بمروركم اخوتى فى الله م- عمرو اختى الفاضله دموع القمر اخى عماد جزاكم الله كل خير