اللى يعرف بدوى العنانى يشكره نيابة عنى

الراجل ده اهدالى رابط لواحد اسمه الشيخ احمد التونى قصيده اسمه يا خمار متخاف الله وبصراحه القصيده دى انا سمعتها زمان سنة 1989 فى فرح كان عند بيت عفيفى فى العزيزيه تقريبا كان زواج حماده عفيفى مش متذكر وكنت شاب صغير مع العيله وروحت فكانت ذكريات القصيده لا تفارقنى ولما حملت هذه القصيده من هذا الرابط رجعت بهذه الذكريات ليوم هذا الاحتفال وطبعا لما يكو الواحد مرتبط بابيه وصاحبه ويفتقده يكون كل مكان جمعهما ذكرى لا تنسى وبصراحه انا سمعت القصيده وركانى انظر الى كل الاحباب الذين افتقدهم وكانوا جلوسا فى ساحة ال عفيفى القديمه وكان يجلس المرحوم عفيفى والحاج محمد عفيفى ووالدى والحاج حسين الله يرحمهم جميعا والشيخ ياسين الانصارى والشيخ محمود السعدنى وطبعا انا مفتكرتش غيرهم لانهم احياء ربنا يديهم الصحه وطبعا الشيخ كحول يتجول فى المكان هائم كعادته وكوكبه من كبار صعايدة دشنا من ناس زمان الطيبين اللى اول ما تشوف الواحد فيهم تبوس ايده ويحسسك انك انت وزير وهو فى سن جدك او ابوك وانت تكون لسه بتنط من سور المدرسه سبحان الله على الناس دى رحم الله الاموات جميعا
http://www.4shared.com/file/208942904/b9c606e4/___-____1.html

أسمعها مباشرة على هنا دشنا

فهمتك أنا , الراجل اللي جاعد على الدكه هناك

لا بقى دى وسعت شويه سنة 1989 انت كان عندك 3 سنين يبقى انت الولد اللى شايله الراجل اللى قاعد ع الدكه ههههههههههههههههههههههههه صح ولا ايه

لا انا اقصد ان فى واحد كاتب موضوع هناك بيقول أهداء الي سيادة المستشار والاخ حماده الشريف و غيرهم
واسمه بدوي العناني وقاعد على الدكه فعلا فى الصوره
لكن شكله كان مسافر
انا عمال أفكر طيب ليه انت كتبت الموضوع ده , لما بقلب لقيته هناك
فضلت اضحك وكنت هنسخولك والله

الله عليك وقت ما تكون عاوز تشد الركاب بتاخد الواحد وتغرقه في بحر الحنين اليك والي المحبين والي الحبيبه دشنا
لانك يا ابو رسلان دايما بذكريات الحبايب عمران
انت ايه يا صاحبي
انت كلك بدشنا هيمان تاخدني منادر وبيوت
وكمان للشيخ كحول ابو نبوت
والله انا دلوقت سلرح ومبحر لشارع المركز وعند المبتكرات واقف مبسوط
وادي سلامه عفيفي وقف يسلم علي
ويقولي فينك ياحاج ناجي دا انا ليك مشدود
وادي العمده علي ابو عوض جاي من المركز وواقف مزهول جيت امتي ياحاج سلامات سلامات يا ابو امير
ونشد المعسل عند قهوه فتوح
ونركب حنطور ونقبل قبلي للصعايده وهات يا زعيم هات مشاريب في معرضك العمران
الله عليكي يا دشنا لما بتحضني الواحد ينسي سنين الغربه ويحلف باليمان ممسافرتاني وخليني هنا جنبك مربوط
سجنك حريه وضيق اليد فيكي بنوك وبنوك
تعمل ايه الاموال وانت غريب وبعيد عن صلاح رسلان واللمه والعمامات
دا انتم الصيد الباقي وغيركده كله شويه خلاقات
وثوب ابيض وساعه وكام من الدولارات
بس ناقصك يا ابو عمه حاجات كتير ومحتاجات
لاشفت جدك فهمي لما مات ولا كام شاب زي المرحوم صبري لما مات
ولا شفت جدتك يوم الدفنه ولا بقيت تسمع منها حكايات
اهين وتلات اهات
علي عمر خدته سنين الغربه والجري ورا هات هات
ولما بترجع لها تلاقي نفسك وعقلك اصبه الهت هات
كان ايه لازمتها الغربه والبعد مسافات
دا انت الي جبته لنفسك وما اخدتش غير شويه ريالات
مالها القعده واللمه مالها الجلبات
ماكنت بتفصل خلاقتك عند مسعود الخياط
يعني لازم تفصلهم عند مريد وتلبس الغاليات
اهين واه من القلب واجعاني انا لو حطيت فيها مش مسافر تاني
كفاياها غربه وبهدله
لا لا انا مش راجع تاني خدوا جوازي وشركوه
خدو ه خدوه بس سيبوني اعيش من تاني وسطكم دا اللمه حلوه والنبي شركوه وخلوني بينكم وبلاش القلب بالغربه تعزبوه
اهين واه بس لما اجيلكم لان القلب فعلا فعلا وحشتوه

[img]

اللى يعرف بدوى العنانى يشكره نيابة عنى GOI86009

[/img]

اللى يعرف بدوى العنانى يشكره نيابة عنى QiZ86208

الصورة الاولى للحاج بدوى العنانى
الصورة الثانية للحاج احمد عيد العنانى
ولو عايز يا سيادة المستشار اجيبلك عيلة العنانى كلها اجيبهالك لحد عندك ولا تزعل اهو قدامك واشكره بنفسك
الاستاذ الفاضل والعضو القادم ان شاء الله تشرف وتآنس المعرض يرحب بيك وبضيوفك احنا نطول

طيب يا اخى لو قابلته قوله صلاح ابو رسلان بيقولك الف شكر على الاهداء اللى اهديته فى المنتدى وياريت يشرفنا فى هنا دشنا وانت يا نائب نفسى اعرف الكلام ده انت بتجيبه ازاى وبتكتبه على طول ولا بيكون مكتوب ده انت فعلا موهبه والله احسن من مجلس الشعب ومن الدوشه تعالى نروح مصر انا وانت واعملك برنامج فى التليفزيون كمان والله مش بهرج بتكلم جد لانك عندك موهبه قليله عند الناس ماشاء الله عليك ربنا يزيدك وشكرا يا زعيم على كلامك الجميل وهو المعرض بتاعك فين عشان نشرب الشاى عندك انا والنائب

صح يا محمد حجاج فعلا هو اهدالى الموضوع ده وانا لا انسى المعروف كنت فاكرك بتقول انك كنت قاعد فى الحفله دى هههههههههههههههههههههههههههههههه