كلنا لازم نبقى .. خبرة !!!

وانا أتابع إعلانات الوظايف المنشورة فى الجرايد، وركزت شويتين، لقيت
فيه حاجة مشتركة بين كل الإعلانات وهى شرط الخبرة، علشان تشتغل فى أى مكان سواء
مدرس أو مهندس أو طبيب أو حتى مكوجى لازم يكون معاك شهادة خبرة
يعنى ببساطة حضرتك اشتغلت فى كام مكان قبل كده وكام سنة، وهل الأماكن
دى " نص نص " ولا بتقبض منها بالدولار ؟!
طيب .. فيه سؤال مهم .. طالما كل الشغلانات
اللى خلقها ربنا محتاجة لشهادة خبر، النص مليون مسكين ومسكينة إللى بيتخرجوا كل
سنة من الجامعات المصرية والمعاهد العليا يعملوا إيه ؟!
قدامهم حلول كتيرة أولها انهم يعملوا زى
باقى زمايلهم السابقين ويقعدوا على القهوة، وهى دى النهاية الطبيعية لخريج الجامعة
اللى مالهوش ضهر ، أو يفكروا شوية ويحاولوا يلاقوا أى شغلانة تانية، يعنى خريج
التربية يشتغل تباع على عربية ، مش عيب، وخريج الهندسة يحاول يلاقى ميكانيكى محترم
يشغل عنده صبى، ده لو وافق طبعا، صحيح الشغلانة مش هتكون مناسبة للمؤهل وأقل فى المستوى
الاجتماعى، بس هو كده أحسن من غيره، فى حل تالت بس فى ناس ممكن تقول عليه حرام،
وهو أن كل شاب بعد ما يتخرج من الجامعة يحاول يضرب كام شهادة خبرة، وكام شهادة
بتقول أنه واد بريمو بيعرف لغات وكمبيوتر وكمان يقدر يطلع للقمر من غير صاروخ،
طبعا دى مش هتلاقى فيها مشكلة لأن أى حد قريبك أو صاحبك بيشتغل فى أى مكان ممكن
يضرب لك الشهادة، ولو ده مش متاح، ما تقلقش، النت مليان إعلانات عن أماكن بتدى
شهادات خبرة وعاملة تسعيرة لكل شهادة، وهتلاقى أرقام تليفونات ناس هتخلص لك
الموضوع فى ثوانى، بس انت عليك " تشخشخ " جيوبك كمان لا زم تاخد بالك ان
فى شركات ومؤسسات بتطلب عدد محدد من سنوات الخبرة يعنى 5 سنين وأحيانا بتوصل ل 10
وده لازم تراعيه وإنت بتعمل الشهادة، بس إوعى تعمل شهادة خبرة ب10 سنين وانت لسه

.متخرج إمبارح
إذا كان أى مكان عايز شهادة خبرة هو نفسه المكان إللى بيدى شهادة
خبرة، بالتالى فالشاب يحتاج لفرصة حتى يحصل على شهادة خبرة، وليس لشهادة خبرة حتى يحصل
على فرصة، ولا هو إللى عايز يشتغل فى أى شركة لازم يكون رجل عجوز وفاضله سنتين على
المعاش، علشان يكون خبرة بجد. وعلى رأى الفنان عادل إمام فى فيلم "التجربة الدانماركية"
واضح إن العروسة دى خبرة خبرة، ومن الواضح إن كلنا لازم نكون زيها .. خبرة خبرة!
والله المستعان

العضو المتميز /احمد
محمد هذا هو حالنا في هذه الأيام


وضع مؤلم ومؤسف وربنا يستر ع الجيل القادم آملين من الله أن يلطف بنا وبأحوالنا وييسر أمورنا
وان يبدل أمورنا من الحال إلى حال والله المستعان!!!!!


اسعدنى مرورك