قضية اغتصاب؟؟؟؟؟؟!!!!

[هحكلكم النهاردة عن قضية اغتصاب والمعروف عن القضايا الى من النوع ده ان بيبقى طرفيها راجل و بنت او ست لكن القضية ديه مختلفة الطرفين مختلفين الطرفين المرة دى حكومة وشعب كامل تخيل شعب كامل تم اغتصابه متستغربش فعلا الشعب المصرى الحكومة اغتصبته مش مصدق طيب تيجى نقارن بين قضية اغتصاب عادية وقضيتنا ديه لو بصيت للبنت ياعينى الى تم اغتصابها تلاقيه مكتئبة وخايفة ومعندهاش ثقة فى حد ومنهارة ومعندهاش امل فى بكرة مش بذمتك هو ده حال المصريين دلوقتى وغير كدة تلاقى ياعينى البنت الى اغتصبت ديه لو شافت اى راجل بتترعب وممكن تجرى من قدامه وتخاف تروح الاماكن الى ممكن يتواجد فيها حد من المغتصبين مش كدة
بص لشعبنا تلاقيه بيخاف ويترعب من الحكومة حتى لو هو معملش حاجة بس بردوه بيخاف من الحكومة ويخاف يدخل القسم لان جواه حكومة ولو جبت سيرة الحكومة قدام حد يقولك ربنا يجعل كلامنا خفيف عليهم .
ها صدقت ان حنا شعب مغتصب ولا لا صدقت ان فيه جريمة اغتصاب ولا لا وعلشان احنا فى بلد بيحكمها القانون والعدل محدش بيجيب سيرة الجريمة ديه.
مع ان التستر على الجريمة اخطر من الجريمة تحب تشوف سكوتنا على الجريمة ديه عمل فينا ايه تعالى شوف .
جرب كدة ادخل اى مصلحة حكومية واتكلم مع موظف حكومة ياه على كمية التناكة والتعقيدى كانك بتتكلم مع واحد فوق مستوى البشر وده طبعا ناتج عن قناعته انه من الحكومة الى تقدر تعمل اى حاجة فينا واحنا من الشعب المكسور الى ميقدرش يتكلم ده طبعا بخلاف كلامك مع ظابط او امين شرطة تلاقيك بتكلمه بحترام اكتر ما بتكلم ابوك وهو بيكلمك بقلة ادب كانه بيكلم كلب.
ده غير الاثر الى ظهر فى علاقتنا ببعضنا كشعب بعيد عنهم طبعا كله مكبوت ومخنوق ومش قادر يتكلم والحياة صعبة وكل واحد مننا مش قادر يتكلم فيطلع غيظه فى البنى ادم الى ماشى جنبه بس الاول يتاكد انه مش من الحكومة وتلاقى خناقات وناس بتشتم بعض ومحدش طايق التانى ومحدش حتى بيبتسم حتى الابتسامة بقيت صعبة والبركة فى الحكومة.